Libros Vivos
Debeu ser fascinante o momento no que se coseron diversos pergamiños e se encadernaron xuntos dando lugar así ao primeiro volume encadernado, é dicir, ao primeiro libro. Dende ese intre xa pasaron moitos séculos e ese invento marabilloso que é o libro segue aí, inalterable ao paso do tempo. No sei se durarán tanto como as Pirámides de Exipto, pero agardo que así sexa.
O tempo sempre xogou ao seu favor, xa que se foi perfeccionando a arte de compoñer libros. Un dos avances principais foi a invención da imprenta e a posibilidade dunha maior difusión do coñecemento. Despois viñeron os gravados, as ilustracións, as fotografías, etc. Foron avances incesantes que melloraron a calidade e a presenza dos libros nas nosas vidas.
Hai quen di que coa chegada das novas tecnoloxías os libros impresos están condenados a desaparecer. Pero eu non o creo, penso que o libro de papel seguirá existindo sempre, porque xa está no ADN da especie humana. Os libros forman parte das nosas lembranzas e recordos da infancia e xogan un papel importante na transmisión de ideas e coñecementos. As novas tecnoloxías terán que convivir cos libros, pero nunca chegarán a substituílos.
Os libros son un tesouro que debemos defender e protexer. Boa parte do que somos debémosllo a eles e así seguirá sendo.
Pipo Arribe